شعر عامية..

 إلي نفسي اللي بكلمها راجل لـ راجل .. 

- أحلامك ليه مش مشروعة ، ولا يمكن يوم راح تتحقق ..؟ 

=إنت اللي عبيط غبي بتدقق في حاجات مش ممكن تحصلك، ولا ممكن أبداً هتكونلك.. 

-

عمال تبنيلي فـ أحلامك 

كان اولى يخطر علي بالك 

إزاي العلاقات الهشة ف الحلم تدوم؟؟؟ 

وإن دامت يعني يا سيدي ف يوم

فا هو مهما يطوّل أصلا حلم.. 

ولايمكن يحصل جوه الفيلم.. 

أحداث لم تكتب في القصة.. 

-

ده لانك عايش في خيالك من وقت كبير.. 

تحت التأثير ، جوا الخيالات ، عالم ديزني.. 

أفكار تناغشني وتنغزني وتقولي تعال.. 

جوالة ف راسي طول الليل ولحد الفجر إما يشقشق.. 

وجفوني بترفض تستسلم ، والحرب لازلت شغالة.. 

وداليدا كانت بتزورني معرفش ليه إفتكرتني 

عمالة ترتل في كلامها وتدوس ع الجرح اللي بيوجع 

وترتل تاني وتغني 

علي بالي علي بالي 

-

والحيرة لازلت موجودة وعينيا بتسرح ع الحيطة تتامل كل اللي عليها.. 

- تقرالي بكيف 

وكأن ف صوت جوايا يقول 

إن الأحداث اللي هتجرا ، ع الحيطة أساسا منقوشة.. 

من وقت ما كنت زمان عيل عمال بتشاقي وبتنطط.. 

-

وبرد عليه وبعلو الصوت 

لو يعني فرضنا ان كلامك صح ومظبوط.. 

تقدر يا فصيح طب تشرحلي إيه اللي بيلمع ع الحيطة؟.. 

اسكت واتهته واتأمل واستنة شوية عليه وأقول.. 

ده كان دبان وقتلته زمان وانا لما كبرت أكيد نور.. 

أو ممكن يعني تكون مثلا علامات بتدل علي عينيها.. 

طب في عربية علي الحيطة ماركتها كمان مش معلومة.. 

فسر لي؟ 

-

عربية في تسلا مصنوعة هتجيلي هدية من صاحبي علشان انا كنت معاه دايما وقت إما إحتاجني ولقاني.. 

- صاحبك معدوم إزاي هيجيبلك عربية من شركة تسلا كمان ما تفوق.. 

=طب بص بعينك حبة لـ فوق وإستحي علي دمك وسؤالك.. 

-طب يعني خلاص ما تعديها وهشوف العلامات بعديها.. 

أنا شايف دبلة علي الحيطة وصوابع" سين "مش لابساها ..

ما أنا أصلي زمان كنت رومانسي ف أكيد ف السكة دي قابلتني حورية جميلة ف عجبتني و أنا كنت أكيد بتمناها.. 

والدبلة دي كانت جيالها لكن محصلش نصيب.. 

-مشيت؟ 

تقريبا .. 

مش عارف 

أو قصدي أقول مشيت خالص.. 

-

أنا خايف جدا علي فكرة.. 

أحلامي كتير بس تخوف.. 

والنور ف العين مش بيشوف.. 

والسكة تتوه متوصلش 

في ناس هتقولك راح نفضل بس متفضلش.. 

وحاجات مـ النادر تلاقيها ومتتكررش.. 

بسذاجة جاهل ترميها وتخرب عرف الموسوعة.. 

وبتفضل دايما بتدور.. 

ف حاجات مرسومة علي الحيطة

ده لانك عايش في خيالك.. 

ولا عمره هيخطر علي بالك.. 

احلامك ليه مش مشروعة...! 

ـــــــــــــــــــــــــــــــــــــ

الشَـاعِر : عُـمَـر رَبِــيَّـعٌ ..'🤎.